Cunt l'arivà la stagiun fredda, arrivava anca ul temp che la gent la sa ritirava in stalla perch' oltre che a costitui ul mument pusse racolt e distensiv da tutt ul periodo del grande riposo, l'era anca ul migliur sistema par comunicà cunt gl’alter, sia grand che fieou, sopratutt attravers la parola.

Chi la minga pruà a viv in di fred stanz di cà d'una voeulta ndue sa pissava ul feoug dumà par cusinà, al pò nemèn immaginà cusa significass ul piasè dal tepur dalla stalla.

La stalla, sempar verta e ventilà durant la stagiun calda, la vegniva serà e tappà ai prim frecc; allura ul calur di besti la scaldava e na faseva un ambient ndue sa pudeva restà senza patì ul frecc. In di giurnà rigid, supratutt quand la terra l'era cuperta da nev, sa sbrigava pusse prest pussibil i laurà e sa rifugiava subit in stalla ca l'era ricover e insema post de laurà.  Ma eran i lung ser invernai che univan tucc i membri dalla famiglia patriarcal, in stalla, e li al ciar d'una misera lanterna, sa ripeteva incunsciament unatt dal viv che al gh’aveva nella sua naturalessa e semplicità ul saùr e ul valur d'un rito.

Sa cenava prest e subit dopu sa rifugiava in stalla nel spazi riservà ai personn ca l'è al da chi dal sulch che ricev ul ruch che par l'abitudin da viv semper visin ai besti, l’era dal tutt natural.  I oman sbrigavan par prim i laurà necessari.

In autunn avanzà sfuiavan ul maragun, taiavan i maragasc par sternì i besti, preparavan i saras par ligà i fasìn de legna, fasevan scuv e scuitt cunt la merga.

Pruedevan a riparà gl’atress da laurà cunsumà durant la stagiun appena passà; mettevan i manich ai sapp e vang, sustituivan i dent rott ai rastei, la ret ai sedass buss, fasevan cavagn e gerli.  Certi voeult custruivan anca di giucatul par i fieou cume ul carettin, i calimuni, la slitta, la gabbia par i canaritt ecc ecc ... I donn lauravan cui gucc; gh’eran semper i scalfitt da fà, oppur fasevan una sciarpa, un maiun, un capelin, ricamavan.

I fieou dopu avè fa i cumpit da scoeura, vutavan un pò i grand a fà un quai laurett e par ul rest giugavan tra lur, a cart, a dama, a tumbula o a oca.

Ma quel che mancava mai in stalla l'era ul parlà, sia par racuntà quel che succedeva in paes, sia par racuntà i pansanich barselett e induinei.

A una cert'ura prima d'andà a lett, gh’era la nonna o la mamma che la tirava foeura la curona dal rusari allura l'atmosfera la sa faseva raccoltale tucc rispundevan ul rusari.

Nella nuena da Natal fasevan ul presepi su l'assa ca gh’era sura ul canapèo piturà sui vedar dalla finestra e ogni sera cantavan ul Tu scendi dalle stelle e La piva par creà l'atmosfera de Natal. Ma la preparaziun liturgica al Natai, la cominciava quatar settiman prima cunt l'Avvento; i matrimoni eran suspes ed eran d'uso riti e pratich da penitenza.

La vigilia, giurnada d'astinenza e da digiun, la sembrava triste, ma la serviva par fà risalta mei la festa dal dì dopu. In passà gh’era no la messa da mezzanott. Finalment arrivava la mattina da Natal; la gesa la sa presentava piena da lus, e parament, cunt ul coro che intunava la pastural accumpagnà dall'organ. Nella capelina da part dall'altar gh’era l'inmancabil presepi che faseva incantà i fieou. Dopu s'andava a cà ndue un past pusse sustansius dal solit sottolineava la ricorrenza.

Inscì ul Natal l'era una gran festa tranquilla nella tranquillità dal ripos invernal.

I fieou logicament eran i pusse cuntent parchè solitament truavan esaudì i so desideri da vegh per l'uccasiun di giucattui noeuv e di mandaritt cunt ul turun.