Finì ul raccolt, terminà i gross laurà e affidà alla tèra la sumenza dal furment par la prossima stagiun, cunt i giurnà che sìn fà coeurt, arriva, insema ai prim brinà che portan puertà e silenzi in di camp, al di di mort.

Ul dì di mort tutt par che cambia aspett: ognun interrump la sua attività.sa occupan da nient'alter che pensà ai trapassà.  In gesa ul pret, al mett i parament ner, da mort, canta le esequie inturna al catafalch ndue stàn simbolicament tutt i mort dal paes, dopu, appena finì le esequie, s’avviava la prucessiun al cimiteri cunt la partecipassiun da tucc.

Ul corteo, che l'era simil a una lunga colonna in marcia, prucedeva par i vii dal paes cunt al centro ul pret e i cireghitt che dividevan ul grupp di oman da quel di donn; sa caminava in silenzio o in preghiera fino a che tucc sa truavan dentar al cimiteri.  Dopu la predica dal pret e la visita ai tumb di parent, tucc turnavan a cà rapidament ndue restavan; alla sera sa recitava tucc insema tre curonn da rusari par i mort e dopu quasi par premi ghlera i castegn.

Ul rito semplice che sa celebrava al dì di mort riprupuneva ancamò una voeulta ul legam cunt la natura; e cume i rugasiun parevan significà l'apertura dalla stagiun primaverii, la prucessiun di mort pareva vurè rappresentà la chiusura dell'annata.

A S.Martin (11 novembre) la stagiun di gross laurà l'è finì e, cunt l'apprusimass dal ripos invernai, ul paisan al tirava la somma dal sò laurà, al faseva ul bilancio dall'annata e andava dal padrun di cà e terren a pagà l'affitt.